Is butegas podint fai una parti manna po sa lìngua sadra, ca funt unu logu ki s'abitaus meda oras a sa di' e ki s'atobiaus a pari cumenti 'esseus de domu. Po cussu su progetu Nuraminis Bilìngua tenit una parti fata a posta po is butegas e totu, po ki 'essant unu logu ki sa genti podit kistionai e ligi su sadru.
Is butegheris podint apicai totu is cartellus scritus siat in italianu siat in sadru, cumenti is oràrius de obertura, is ofertas, sa cosa proibia, avisus e aici nendi. Fait a fai po fintzas is picigosus (adesivi), is insinnas, is etikeddas, is catàlogu e aici nendi. Totu custu traballu ddu fait s’Ufìtziu de sa Lìngua Sadra e is butegas no depint pagai nudda.
De custa bèndida fata in sadru puru is butegheris nci goràngiant luegus ca sa genti ddus biri prus a canta a issus, prus crarus e deretus cumenti kistiònat sa genti e totu. No est mancu po nudda ca sempri prus siendas ponint unu nòmini in sadru a sa cosa ki faint: diferentementi de su passau, oindi' scrint totus pani carasau e giai nisciunus carta da musica, culixonis e no prus ravioli di ricotta, durkes e no prus savoiardi di Fonni e aici nendi.
Custu de bendi cun su sadru est una cosa aici de profetu ca funt ponendidda po fintzas po sa cosa ki no eus imbentau nosu sadrus. Is patateddas a fritu po is piciokeddus, a primu teniant sempri nòminis stranjus (dixi, charlie, stick ... ) ma oindi' una sienda forti e arrica ddis at postu nòmionis sadrus (in logudoresu): cròkias, moros, bastos e atrus. 'Olit nai ca ndi ddi 'enit cosa, de si nunca no dd'iant a fai.
Innoi eis a biri is butegas nuraminesas ki s'ant a pigai cust'impinnu, apikendi a craru is manifestus ki ddi feus a posta.
In prus si podeis castiai custus dogumentus:
A kini 'olit gosai de custu srebìtziu podit lassai su nòmini suu a su Comunu o podit scriri in deretura a s'Ofìtziu de sa Lìngua Sadra. S'impreau de s'Ofìtziu dd'at a tzerriai e s'ant a ponni di acòrdiu po si biri e detzidi su traballu.